Pretendimi: Pas zgjedhjeve parlamentare në Serbi, ushtria doli në rrugë në Beograd
Verdikti: E pavërtetë
———————————————————————————–
Pasi zgjedhjet e 25 tetorit në Serbi rrëzuan nga pushteti pas 14 vitesh partinë e presidentit Aleksandar Vucic, në mediat shqipfolëse qarkulloi lajmi (arkivuar këtu) se në Beograd kishte nisur lufta dhe ushtria kishte dalë në rrugë.

Megjithëse titujt e artikujve pretendojnë se ushtria ka zbarkuar në rrugët e Beogradit, brendia e tekstit nuk përmend fare ushtrinë, dhe rrjedhimisht nuk ofron asnjë provë, burim apo referencë që mbështet pretendimin e titullit.
Pamjet në krye të artikullit nuk tregojnë pjesëtarë të ushtrisë serbe, por oficerë policie të pajisur me mjete për kontrollin e turmave. Ato janë shkëputur nga një kronikë e 23 tetorit 2026, e cila flet për “rrëmbime, përgjime e rrahje” që u kanë paraprirë zgjedhjeve të 25 tetorit. Kronika nuk përmend në asnjë pjesë ushtrinë serbe, aq më pak vendosjen e tyre në rrugët e Beogradit.
Si kronika nga është shkëputur pamja, dhe brendia e artikujve me tituj keqinformues përmbledhin ose riprodhojnë krejtësisht një artikull të botuar më 22 tetor në median ndërkombëtare Reuters me titullin “Rrahjet, sulmet kibernetike dhe kërcënimet e zymtësojnë Serbinë e Vuçiçit në prag të zgjedhjeve.” As ky artikull nuk përmend ndokund ushtrinë serbe apo mobilizimin e saj.
Zgjedhje të parakohshme parlamentare u mbajtën në Serbi më 25 tetor 2026. Zgjedhjet fillimisht ishin planifikuar deri në dhjetor 2027. Aleksandar Vuçiç, asokohe president i Serbisë, shpërndau Kuvendin Kombëtar dhe shpalli zgjedhjet më 9 shtator 2026, me propozim të qeverisë. Lista Studentore (SL) fitoi zgjedhjet me shumicën absolute të vendeve, duke mundur Partinë Progresive Serbe (SNS), e cila kishte qenë në pushtet që nga viti 2012.
Sipas rezultateve përfundimtare të shpallura më 5 nëntor “Lista Studentore” fitoi 53,69% të votave dhe 140 nga 250 mandatet, ndërsa lista “Aleksandar Vučić – Serbia e Bashkuar”, e udhëhequr nga SNS-ja, fitoi 39,48% dhe 103 mandate. Përveç pesë listave të pakicave kombëtare, të cilat përjashtohen nga pragun zgjedhor, asnjë listë tjetër nuk fitoi mandate. Pjesëmarrja në votime ishte 68,89%, rreth dhjetë pikë përqindjeje më e lartë se në vitin 2023. Vuçiç e pranoi humbjen natën e zgjedhjeve.






