Jona Cenameri
Në fushatën për zgjedhjet vendore të vitit 2023, Fisnik Qosja premtoi se të rinjtë e moshës 18-35 vjeç që hapnin një biznes në Kavajë do të përfitonin nga “zero taksa”. Tre vjet më vonë, vetë Bashkia Kavajë konfirmon për Faktoje se kjo masë nuk është zbatuar.
Premtimi
Në paketën sociale të publikuar gjatë fushatës së vitit 2023, Fisnik Qosja premtonte:
“0 taksa për çdo biznes të hapur nga sipërmarrës të rinj në moshën 18 deri në 35 vjeç.”
Premtimi për lehtësimin nga taksat të bizneseve të hapura nga të rinjtë ishte pjesë e platformës së tij elektorale për Kavajën. Edhe gjatë fushatës u raportua se plani parashikonte “zero taksa” për bizneset që do të hapnin të rinjtë në qytet.
Çfarë thotë Bashkia Kavajë
Faktoje iu drejtua Bashkisë Kavajë për të mësuar nëse masa ishte zbatuar dhe sa të rinj kishin përfituar prej saj.
Përgjigjja e institucionit është e qartë:
“Në Bashkinë Kavajë nuk është zbatuar ‘zero taksa për çdo biznes të hapur nga sipërmarrës të rinj të moshës 18-35 vjeç.”
Sipas Bashkisë, nuk është miratuar asnjë vendim i Këshillit Bashkiak për këtë masë dhe nuk ka taksa apo tarifa vendore të përfshira në të.
Institucioni konfirmon gjithashtu se nuk ka asnjë biznes apo subjekt përfitues dhe asnjë vlerë taksash ose tarifash vendore të përjashtuara në kuadër të këtij premtimi.
Çfarë thonë të rinjtë
Faktoje pyeti edhe të rinj në Kavajë për premtimin.
Një djalë rreth të 20-ave tha se nuk kishte dëgjuar më parë për masën e premtuar.
Një tjetër i ri shpjegoi se studion në Tiranë dhe kthehet në Kavajë vetëm gjatë pushimeve, ndërsa një vajzë e së njëjtës grupmoshë u shpreh e habitur kur u pyet për premtimin.
Përfundimi
Fisnik Qosja premtoi në vitin 2023 “zero taksa” për bizneset e hapura nga sipërmarrës të rinj të moshës 18-35 vjeç.
Tre vjet më vonë, Bashkia Kavajë konfirmon se masa nuk është zbatuar: nuk ka vendim të Këshillit Bashkiak, nuk janë përcaktuar taksat apo tarifat që do të përjashtoheshin dhe nuk ka asnjë biznes përfitues.
Faktoje, e mbështetur nga National Endowment for Democracy (NED), po monitoron 10 bashki në vend dhe po verifikon zbatimin e premtimeve të dhëna nga kryebashkiakët.
