Pretendimi: Qeveria Rama papritur “fal” borxhet e shqiptarëve
Verdikti: Mungon konteksti
————————————————–
Një postim që ka marrë mbi 400 pëlqime në Facebook jep lajmin e mirë se qeveria Rama do të falë papritur borxhet e shqiptarëve.
Megjithatë, borxhliu kureshtar do të zhgënjehet kur të hapë artikullin e lidhur në komente.
Në brendinë e artikullit sqarohet se bëhet fjalë për një “reformë të thellë fiskale” të quajtur “Paqja Fiskale 2026-2029” që “parashikon fshirjen e detyrimeve tatimore më të vjetra se 10 vjet, si dhe kríjimin e një skeme të re për ripagimin e borxheve më të reja, me përqíndje të reduktuara dhe kushte lehtësuese për bizneset.”
Paketa e Paqes Fiskale u prezantua nga kryeministri Rama në prill 2025 gjatë fushatës elektorale, pra vështirë se mund të thuhet që ky lajm ishte i papritur.
Ajo ishte pjesë e programit të qeverisë që u miratua në Kuvend në shtator 2025.
Siç Faktoje shpjegoi në atë kohë, nisma parashikon fshirjen e plotë të borxheve tatimore më të vjetra se 10 vite, nëse janë ende të pashlyera. Për detyrimet nga 5-10 vite parashikohet fshirje 50% e borxhit, nëse biznesi e paguan menjëherë. Ndërsa bizneset që nuk kanë mundësi për shlyerje të menjëhershme, do të ketë një marrëveshje 12 mujore dhe falja do të jetë në masën 25%. Nuk përfshihen këtu detyrimet për sigurimet shoqërore.
Ky nuk është rasti i parë që falen borxhe në periudha parazgjedhore. Që nga viti 2009, janë ndërmarrë të paktën 6 masa me karakter amnistues, të cilat përkojnë me zgjedhje vendore apo parlamentare.
Ekspertët e ekonomisë dhe financave e kanë kritikuar ashpër nismën, duke e cilësuar si një sinjal të gabuar dhe të rrezikshëm. Ish-drejtori i Tatimeve, Artur Papajani, e quan fshirjen masive të borxheve një ndëshkim për bizneset që kanë qenë korrektë ndër vite, ndërsa audituesi ligjor Julian Saraçi shkon më tej, duke e përshkruar si një kapitullim të shtetit përballë informalitetit të toleruar. Sipas tij, kjo nuk është një marrëveshje, por një shpëlarje faji për dështimet institucionale në mbledhjen e borxheve.
