Pretendimi: Media Politico ka marrë 8 milionë dollarë financim nga USAID
Verdikti: Mungon konteksti
——————————————————————-
Presidenti amerikan Donald Trump ka pretenduar, në një postim në Truth Social më 6 shkurt 2025, se Agjencia e Shteteve të Bashkuara për Ndihmën Humanitare Ndërkombëtare (USAID) ka paguar mediat për të publikuar lajme të favorshme për Partinë Demokratike. Për shembull, lideri republikan lë të kuptohet se agjencia financoi median amerikane Politico me 8 milionë dollarë. “A mori para New York Times?” Trump pyet në postimin e tij, duke thënë se ajo që u raportua “mund” të përfaqësojë skandalin më të madh në histori.
Pretendimi i Trump, megjithëse nuk shoqërohej me ndonjë provë apo burim, është transmetuar në mënyrë jo kritike nga një numër mediash dhe portalesh shqipfolëse.
Në postimin e tij të plotë Donald Trump shkruante:
DUKET SI TË JANË VJEDHUR MILIONA DOLLARA NË USAID, DHE AGJENCI TË TJERA, PJESA Më E MADHE E TYRE PO I SHKON MEDIAS Së LAJMEVE Të RREME SI “SHPAGIM” PËR KRIJIMIN E ARTIKUJVE POZITIVë PËR DEMOKRATËT. “LECKA” E KRAHUT TË MAJTË, I NJOHUR SI “POLITICO”, DUKET SE KA MARRE 8,000,000$. A mori para New York Times??? Kush tjetër??? KY MUND TË JETË SKANDALI MË I MADH NGA TË GJITHË, NDOSHTA MË I MADHI NË HISTORI! DEMOKRATËT NUK MUND TË FSHIHEN NGA KJO. SHUMË I MADH, SHUMË I PISTË!
Ndër përhapësit kryesorë të këtij pretendimi janë gazetari Kyle Becker dhe YouTuber Benny Johnson. I pari që botoi lajmin e pretenduar ishte Becker, i cili më 5 shkurt postoi disa pamje të profilit Politico (Politico LLC) nga faqja USASpending.gov, bazën e të dhënave publike të shpenzimeve të qeverisë federale të ShBA. Në imazh, si dhe në faqe, realisht mund të lexojmë një shpenzim prej 8.2 milionë dollarësh në favor të gazetës në lidhje me 12 muajt e fundit të raportimit, krahasuar me një total prej 34 milionë dollarësh nga viti 2015 e deri më sot. Por, ndryshe nga sa deklaron Becker, faqja institucionale nuk tregon në asnjë mënyrë se 8 milionë janë nga financimi i USAID-it.
Për të verifikuar shumën aktuale të paguar nga një agjenci si USAID për Politico, thjesht përdorim kërkimin e avancuar në USASpending.gov. Duke zgjedhur filtrat e duhur dhe duke marrë parasysh të gjitha vitet fiskale nga viti 2008 deri në vitin 2025, rezulton se Agjencia për Zhvillim Ndërkombëtar (USAID) i ka paguar Politico LLC gjithsej 44 mijë dollarë, dhe jo 8 milionë dollarë.
Nga kërkimi rezultojnë dy pagesa, përkatësisht 24 mijë (në 2024) dhe 20 mijë dollarë (në 2023). USASpending.gov ju lejon të konsultoni të dyja arsyet e pagesës, duke theksuar se ato nuk kanë të bëjnë me aktivitete propagandistike. Pagesa e parë raporton si arsye “REFS/CCPD E&E ABONIM LAJME 24,000$”, ndërsa e dyta “JAN ARGILAGOS, DDI/EEI, E&E NEWS ABONIM”. Rezulton pra se USAID thjesht është abonuar në median Politico.
Politico vërtet mori më shumë se 8 milionë dollarë në vitin fiskal 2024 nga departamente dhe agjenci të tjera federale, tregojnë të dhënat e USA Spending. Agjencitë që kanë paguar shumat më të larta në atë periudhë janë Departamenti i Shëndetësisë dhe Shërbimeve Njerëzore (1.37 milionë dollarë), Departamenti i Brendshëm (1.35 milionë dollarë), Departamenti i Energjisë (1.29 milionë dollarë), Departamenti i Bujqësisë (552 mijë dollarë), dhe Departamenti i Tregtisë (485 mijë dollarë).
Paratë ishin për të paguar për abonimet e Politico dhe aksesin në Politico Pro, i cili ofron “lajme jopartiake, inteligjencë në kohë reale, analiza të thella, drejtori qeveritare, zgjidhje të menaxhimit të palëve të interesuara, mjete monitorimi politikash” dhe shërbime të tjera të personalizuara, sipas faqes së saj të internetit.
Një listë e disbursimeve të Dhomës së Përfaqësuesve të SHBA tregon se dhjetëra anëtarë janë të abonuar me pagesë në Politico Pro dhe E&E News.
Në total, databaza e USA Spending raportoi 646 transaksione mes qeverisë federale dhe Politico që nga viti fiskal 2015. Transaksionet klasifikohen si kontrata, jo si grante, kredi apo pagesa direkte, të cilat janë lloje të kategorive të shpenzimeve qeveritare.
Kreu i Politico, Goli Sheikholeslami dhe kryeredaktori John F. Harris iu përgjigjën pretendimeve me një deklaratë më 6 shkurt, duke thënë, “POLITICO është një kompani private. Ne kurrë nuk kemi marrë asnjë financim nga qeveria – asnjë subvencion, asnjë grant, asnjë ndihmë. Asnjë monedhë në 18 vjet. … Mbështetet nga reklamat dhe sponsorizimet.”
“POLITICO Pro është ndryshe,” vijon deklarata. “Është një shërbim abonimi profesional që përdoret nga kompani, organizata dhe, po, disa agjenci qeveritare. Ata abonohen sepse kjo i bën ata më të mirë në punën e tyre – duke i ndihmuar të gjurmojnë politikat, legjislacionin dhe rregulloret në kohë reale me lajme, inteligjencë dhe një sërë produktesh të dhënash.”
Qeveria federale përbën një pjesë të vogël të bazës së abonentëve të Politico Pro. Në një intervistë të 6 shkurtit, Mathias Döpfner, CEO i kompanisë mëmë të Politico, Axel Springer, i tha CNN se Politico Pro aktualisht ka rreth 5000 abonentë, rreth 6% e të cilëve punojnë në qeveri.
Abonimet në Politico Pro nuk ishin unike për administratën Biden. Qeveria amerikane gjithashtu ka paguar për abonime në vitet fiskale 2017 deri në 2020, kur Trump ishte në detyrë. Sipas USA Spending, gjatë mandatit të parë të Trump, qeveria federale ra dakord për 10.2 milionë dollarë detyrime kontraktuale ndaj Politico.
Ndryshe nga financimi ose një grant financiar, pagesat e qeverisë federale për Politico nën administratën Trump dhe Biden përbënin një marrëveshje kontraktuale për të ofruar një shërbim në këmbim të një tarife abonimi.
Deklarata e Politico shpjegon, “Agjencitë qeveritare që abonohen e bëjnë këtë përmes proceseve standarde të prokurimit publik – ashtu si çdo mjet tjetër që blejnë për të punuar me më efikasitet. Ky nuk është financim. Është një transaksion – ashtu siç qeveria blen hulumtime, pajisje, softuer dhe raporte të industrisë. Disa zëra në internet po përhapin qëllimisht gënjeshtra. Le të jemi të qartë: POLITICO nuk ka asnjë varësi financiare nga qeveria dhe asnjë axhendë të fshehur.”
