Pretendimi: Ura e Kukësit ka dalë me probleme dhe është drejt shembjes.
Verdikti: Mungon konteksti
——————————————————–
Në rrjetet sociale shqipfolëse po qarkullon lajmi alarmant se ura e çeliktë e ndërtuar në hyrje të Kukësit, mbi të cilën kalon Rruga e Kombit, është me probleme dhe po shkon drejt shembjes.
Ky pretendim duket se e ka zanafillën në një lajm të botuar më 24 prill në disa media shqiptare, sipas së cilit koncesionari i Rrugës së Kombit, kompania Salillari, ka paditur nënkontraktorin italian për ndërtimin e Urës së Madhe të Kukësit.
Artikujt e mësipërm i referohen një njoftimi të botuar nga Gjykata e Lartë më 9 prill 2025, ku lajmërohet vendimi i gjykatës për ta dërguar padinë e Salillarit për gjykim në Gjykatën Administrative të Shkallës së Parë Tiranë.
Në njoftimin e Gjykatës jepen disa detaje nga pretendimet e paditësit, përfshi “pagimin e të gjitha shpenzimeve, pagesave dhe kostove të pësuara nga Paditësi [Salillari] për ripërsëritjen e punimeve dhe riparimin e defekteve të MAEG.”
Pretendimet e padisë, për aq kohë sa nuk ka një vendim gjykate mbi to, mbeten pretendime.
Më tej, edhe nëse pretendimet e padisë merren të mirëqena, mangësitë në punën e nënkontraktorit MAEG janë mbuluar nga kompania Salillari. Për këtë mbulim, kompania ka paditur nënkontraktorin duke i kërkuar dëmshpërblim.
Ç’është më e rëndësishme, askund në artikujt e mësipërm, apo në njoftimin e Gjykatës, nuk përmendet shembja e mundshme e urës.
