Australianët nuk po protestojnë në shesh kundër vendosjes së masave anti-Covid. Pamjet që qarkullojnë në rrjetet sociale i përkasin dy viteve më parë dhe janë risjellë si aktuale, për të krijuar panik te qytetarët.
Një postim i shpërndarë në rrjetet sociale pretendon se në Australi njerëzit po protestojnë kundër mbylljes dhe rikthimit të masave anti-Covid. Veç kësaj, nëpërmjet këtyre postimeve ngrihet alarmi se kjo do të nisë shumë shpejt edhe në Shqipëri.
‘Në Australi 20 mijë persona protestojnë në sheshe për mos t’u vendosur mbyllje dhe vënia e masave prej Covid. Filluan të mbyllin njerëzit. Shumë shpejt fillon në Shqipëri, në fillim do fillojë në Itali në fillim të tetorit”-shkruajnë përdorues në rrjetet sociale.
Postimi i shpërndarë në rrjetet sociale
Nisur nga interesi që kanë ngjarje të tilla, Faktoje vendosi të bëjë një verifikim të zhvillimeve që pretendohet se po ndodhin së fundmi në Australi.
Nëpërmjet mjeteve të verifikimit të fotove, zbuluam së në fakt pamjet i përkasin nëntorit të vitit 2021, ku australianët protestonin kundër masave të Covid që ishin në fuqi.
“Pamje të demonstratave masive në Melburn të shtunën (nëntor 2021), ku mijëra persona dolën për të protestuar ndaj bllokimeve të COVID dhe një projekt-ligj që do t’i jepte ekzekutivit fuqi të pacaktuara në raste emergjence – Protestat më të mëdha të Australisë ndër vite”-shkruhet krahas pamjeve të publikuara.
Këto pamje qarkulluan masivisht në mediat sociale në atë kohë. Ndryshe nga çfarë pretendohet në postimet që qarkullojnë në rrjetet sociale në vendin tonë, aktualisht nuk ka protesta në Australi për sa i përket çështjeve që lidhen me masat e Covid-19 si dhe ndonjë vendimmarrje të autoriteteve për të rikthyer masat anti-Covid.
Disa ditë më parë, në Australi u zhvillua një miting me rreth 20 mijë pjesëmarrës pro referendumit që do të zhvillohet në tetor në lidhje me përfshirjen e indigjenëve në kushtetutën e vendit si dhe krijimin e një organi këshillues për t’u ofruar banorëve aborigjenë të dhëna mbi politikat që prekin ata.
Australianët indigjenë, të cilët përbëjnë 3.8% të popullsisë, përballen me disavantazhe, duke përfshirë diskriminim, trajtim të pabarabartë shëndetësor e arsimor dhe shifra të larta të burgosjeve.
