Pretendimi: Në 1933, 150 mijë hebrenj u mblodhën në Chicago për të simuluar një flijim fëmije për Molokun.
Verdikti: Mungon konteksti
——————————————–
Në rrjetet konspiracioniste, përfshi ato shqipfolëse, po qarkullon pretendimi i jashtëzakonshëm se në vitin 1933, “150 mijë hebrenj u mblodhën në Chicago për një “paradë historike” të njohur si “Romanca e një Populli” për të simuluar një flijim fëmije për Molokun.”
“Romanca e një Populli” është vërtet emri i një spektakli që u mbajt në Chicago, ShBA më 3 korrik 1933.
Walter Roth, ish-president i Shoqërisë Historike Hebraike të Chicago, në librin e tij “Duke parë prapa: Histori të vërteta nga e kaluara hebraike e Chicago” e përshkruan si “spektakli më i madh hebre i organizuar ndonjëherë në Chicago” për mbi 125 mijë persona.
I sponsorizuar nga Agjencia Hebraike për Palestinën, Romanca e një Populli ishte ngjarja kulminante e Ditës Hebraike në panairin botëror. Panairi ishte një përpjekje kolosale, e planifikuar për mbi pesë vjet, e projektuar për të reklamuar progresin e bërë nga Shtetet e Bashkuara dhe nga Chicago në fushat e teknologjisë, shkencës dhe industrisë gjatë njëqind viteve të mëparshme. Komiteti i Panairit kishte caktuar mbi 20 ditë të veçanta, një për secilën prej kombësive që përbënin popullsinë emigrante të Chicago.
Romanca e një Populli, siç tregohet në titull, ishte një rikrijim i historisë hebraike.
Në atë kohë, New York Times e quajti “historia e luftës së një populli për të gjetur Zotin dhe për të sjellë liri në tokë” duke shkruar: “Ishte një spektakël mahnitës; bekimet e kënduara nga priftërinjtë me rroba të bardha, gjoksorët e të cilëve të stolisur me gurë të çmuar shkëlqenin; gjëmimi i trombëve të brirëve të dashit, tingulli i kambanave, tundja e palmave.”
S. J. Duncan-Clark e përshkroi pjesën, së cilës i referohet postimi i mësipërm për Chicago Daily News si portretizim të “luftës së zymtë kundër adhurimit demonik të Molokut.”
Chicago Daily Tribune botoi një foto të kësaj sekuence me diçiturën: “Sakrifikimi i një virgjëreshe për Molokun” dhe e përshkroi spektaklin si “një histori e popullit hebre ndër shekuj.”
Pra, megjithëse pretendimi i mësipërm përdor një numër faktesh historike për të ndërtuar një narrativë anti-semitike, ai është i rremë.
Në 3 korrik 1933, 125 mijë persona u mblodhën në Chicago për të parë një rikrijim të historisë së hebrenjve (një versioni të saj) të quajtur Romanca e një Populli që përfshinte, ndër të tjera, një rikrijim të një flijimi për Molokun.
Të njëjtat rikrijime të traditave fetare apo folklorike të kombësive të tjera u ndoqën masivisht gjatë Panairit Botëror në ditët e tjera të zhvillimit të tij.
