Pretendimi: Kozmonauti polak në këtë video pranon se Toka është e sheshtë
Verdikti: Mungon konteksti
——————————————————
Në rrjetet konspiracioniste po qarkullon një video që pretendohet se tregon një astronaut polak, i cili pranon në një intervistë se Toka është e sheshtë.
Më anë të motorit të kërkimit pamor Google Lens, Faktoje gjeti se klipi i mësipërm është shkëputur nga një intervistë më e gjatë e vitit 2018 me gjeneralin Miroslaw Hermaszewski.
Në intervistë, ai merr disa pyetje qesharake, të cilave u dha përgjigje po aq qesharake me një ton humoristik, duke përfshirë pyetjen në fund të intervistës ku ai pyetet nëse Toka është e sheshtë. Gjenerali befasohet nga pyetja, por ai vendos të bëjë gjoja dhe të përgjigjet “është e sheshtë”.
Kjo shaka e gjeneralit është marrë seriozisht nga konspiracionistët e Tokës së Sheshtë.
Në pjesën tjetër të intervistës, e cila kishte të bënte me mënyrën sesi gjenerali u bë astronaut dhe më përvojën e tij në hapësirë, ai përmend se hodhi një sy jashtë dritares së anijes së tij kozmike për t’u siguruar që gjithçka ishte në rregull dhe dëshmoi se Toka është një sferë:
“Doja t’i hidhja një sy Tokës për të parë nëse po binim dhe duke parë, vura re, është në të vërtetë e rrumbullakët, dhe dielli po perëndonte sepse ne po fluturonim në drejtim lindor.”
Një pyetje tjetër qesharake gjatë intervistës ishte nëse ai ka parë ndonjëherë një UFO. Ashtu si në pyetjen e fundit, ai bëri shaka duke i thënë intervistuesit se nuk mund t’i përgjigjet pyetjes në kamera, përpara se të niste të qeshte.
