Lagjja “Skënderbeg” në Lezhë është përfshirë në një seri ndërhyrjesh të Bashkisë për përmirësimin e infrastrukturës.
Projekti parashikon rikualifikimin e dy rrugëve dhe rikonstruksionin e kopshtit të lagjes.
Sipas përgjigjes së Bashkisë Lezhë për Faktoje, rikualifikimi i rrugëve “Mbretëresha Teuta” dhe “Abat Preng Doçi” ka nisur në vitin 2025, ndërsa përfundimi i tyre është parashikuar gjatë vitit 2026.
Ndërkohë, në të njëjtën paketë ndërhyrjesh është përfshirë edhe rikonstruksioni i kopshtit “Skënderbeg”, i cili sipas Bashkisë ka nisur dhe pritet të përfundojë gjatë vitit 2026.
Rrugët janë rikonstruktuar
Për rikualifikimin e rrugës “Mbretëresha Teuta”, Bashkia ka parashikuar një investim prej 10.733.535 lekësh, ndërsa për “Abat Preng Doçi” investimi është 6.588.340 lekë.
Sipas informacionit të Bashkisë, të dyja ndërhyrjet janë realizuar.
Edhe sipas verifikimit të Faktojes në shtator në terren, të dyja rrugët rezultojnë të rikualifikuara.
Një tjetër pjesë e projektit është rikonstruksioni i kopshtit “Skënderbeg”, për të cilin është parashikuar një investim prej 13.061.966 lekësh.
Punimet janë në proces dhe Bashkia parashikon përfundimin e tyre gjatë vitit 2026.
Në total, tre ndërhyrjet kanë një vlerë prej rreth 30.4 milionë lekësh dhe financohen nga buxheti i Bashkisë Lezhë.
Po trotuaret dhe ndriçimi?
Përveç rrugëve dhe kopshtit, Bashkisë iu kërkua informacion nga Faktoje edhe për ndërhyrje të tjera që lidhen me rikualifikimin urban të lagjes, si trotuaret, ndriçimi publik, gjelbërimi, kanalizimet, hapësirat publike dhe parkimet.
Për këto ndërhyrje, Bashkia sqaron se në të ardhmen parashikohet përmirësimi i ndriçimit në disa segmente dhe riparimi i trotuareve.
Këto ndërhyrje nuk janë pjesë e asaj që është realizuar deri në momentin e verifikimit dhe, për rrjedhojë, nuk llogariten si të parealizuara brenda afatit të premtimit aktual.
Ato i përkasin fazave të ardhshme të ndërhyrjes në lagje.
Përfundimi
Verifikimi i Faktoje tregon se një pjesë e rëndësishme e ndërhyrjeve të parashikuara për lagjen “Skënderbeg” është realizuar.
Dy rrugët e përfshira në projekt janë rikualifikuar, ndërsa rikonstruksioni i kopshtit “Skënderbeg” është në proces dhe pritet të përfundojë gjatë vitit 2026.
Për këto arsye, në momentin e verifikimit, Faktoje e konsideron premtimin e kryebashkiakut Pjerin Ndreu pjesërisht të mbajtur.
Faktoje, e mbështetur nga National Endowment Democracy (NED) po monitoron 10 bashki në vend dhe po verifikon nëse janë mbajtur ose jo premtimet e dhëna nga kryebashkiakët
