Situata e krijuar në Ukrainë pas nisjes së luftës nga Rusia në shkurt 2022, është një nga temat e preferuara të “gjuetarëve” të klikimeve në rrjet. Publikimi i lajmeve që bazohen në informacione të vjetra, është praktikë e përhapur në portalet online. Ky është rasti i lajmit me titullin e bujshëm “LAJMI MADH Per Ukrainen! Njofton Zelenskiy!! Ja cfare ka ndodhur…” të publikuar nga “newstimesbd24.com”.
Jona Plumbi
Lufta në Ukrainë është kthyer në “grep” për portalet online që publikojnë artikuj me tituj të ekzagjeruar, me qëllim marrjen e sa më shumë klikimeve. Informacionet shpesh janë të pavërteta apo të vjetëruara, gjë që sjell keqinformimin e lexuesve. I tillë është lajmi i publikuar nga “newstimesbd24.com” në datën 20 Tetor 2022, pavarësisht se lajmi flet për një ngjarje që ka ndodhur në datën 26 shkurt.
Artikulli i publikuar nuk jep asnjë referencë kohe apo burim informacioni mbi ngjarjen. Por data e publikimit të këtij artikulli shfaqet në adresën e saj në rrjet (link) të theksuar me të verdhë ne imazhin më poshtë.
Faktoje verifikoi se lajmi, në të vërtetë i përket muajit shkurt, pak ditë pas nisjes së luftës në Ukrainë, kur ishte e nevojshme që të evitohej rreziku i një sulmi masiv të ushtrisë ruse me qëllim marrjen e Kievit. Burim i këtij informacioni ka qënë vetë presidenti ukrainas, Volodymir Zelenski. Në rrjetin social Instagram ai ka shpërndarë shkrimin ku falenderonte presidentin turk Erdogan për mbështetjen përmes ndalimit të kalimit të anijeve luftarake ruse në Detin e Zi.
Lajmi u pasqyrua edhe në mediat ukrainase, ato ndërkombëtare, si dhe në shtypin vendas, në datën 26 Shkurt 2022. Që prej këtij momenti kanë ndodhur shumë zhvillime në frontin ukrainas dhe vetë situatën e sigurisë në Detin e Zi. Në muajt e verës, Turqia u ofrua bë gjithashtu ndërmjetëse për të mundësuar çminimin e ujrave ukrainase në Detin e Zi, për të lejuar kalimin e anijeve të ngarkuara me grurë.
Përdorimi i temave që ngjallin interes tek njerëzit, duke risjellë lajme të vjetra, ka vetëm një qëllim: mbledhjen e klikimeve për përfitime personale. Shpërndarja e lajmeve të vjetra me tituj të bujshëm sjell keqinformim tek lexuesit, të cilëve nuk i ofrohet informacion i plotë.
*Lajmi publikohet në kuadër të bashkëpunimit mes Faktoje dhe Facebook për të luftuar dizinformimin
