Pretendimi: Godina e Rezervës Federale amerikane është mbyllur prej 7 vitesh dhe nuk prodhon më dollarë
Verdikti: E pavërtetë
—————————————————————–
Në rrjetet konspiracioniste shqipfolëse po qarkullon pretendimi se godina e Rezervës Federale amerikane është mbyllur prej 7 vitesh dhe nuk prodhon më dollarë. Ky pretendim shoqërohet me foton e një godine që duket se është mbuluar si për restaurim.
Me anë të motorrit të kërkimit Google Lens, Faktoje gjeti se imazhi i mësipërm është botuar në X/Twitter dy vite më parë, në shtator 2023.
Megjithatë, kjo nuk dëshmon se Rezerva Federale është mbyllur, aq më pak prej 7 vitesh.
Në 2024, një zëdhënës i Rezervës Federale tha për AFP se banka ka qenë nën rinovim të paktën që nga Nëntori 2022.
“Rezerva Federale do të mbetet e hapur gjatë gjithë projektit të ndërtimit dhe operacionet e Rezervës Federale nuk preken”, thoshte në atë kohë faqja zyrtare e internetit.
Komisioni Kombëtar i Planifikimit të Kapitalit miratoi planet e ndërtimit në shtator 2021.
AFP vizitoi ndërtesën më 9 korrik 2024 dhe pa tabela që identifikonin vendin e ndërtimit.
Në korrik 2025, në faqen e saj zyrtare, Rezerva Federale postoi një video që shpjegonte se projekti është një “rinovim dhe modernizim i plotë” i dy ndërtesave që nuk kanë pasur rinovime të mëdha që nga vitet 1930.
Ky sqarim erdhi pasi Shtëpia e Bardhë pretendoi se Rezerva Federale keqmenaxhoi fondet për rinovimet, të cilat u miratuan në vitin 2017 dhe u vlerësuan të kushtonin 1.9 miliardë dollarë në vitin 2019. Kostot tani vlerësohen të jenë afër 2.5 miliardë dollarëve. Presidenti amerikan Donald Trump ka pretenduar se “është e mundur të ketë mashtrim të përfshirë.”
Sistemi i Rezervës Federale, emri zyrtar i Rezervës Federale, është banka qendrore e Shteteve të Bashkuara dhe u krijua me miratimin e Aktit të Rezervës Federale të vitit 1913.
Kongresi i Shteteve të Bashkuara i dha Rezervës Federale rolin e përcaktimit të politikës monetare të SHBA për të nxitur punësimin maksimal dhe stabilitetin e çmimeve në ekonominë amerikane. Kjo njihet si “mandati i dyfishtë” i Rezervës Federale.
Përveç kësaj, Kongresi i dha asaj gjithashtu një shkallë të konsiderueshme pavarësie sepse nuk ka nevojë për miratim nga presidenti ose nga kushdo tjetër në qeveri për të marrë vendime, të cilat bazohen në “analiza dhe të dhëna objektive”, siç thuhet në faqen e tyre të internetit.
