Rrenat e Ballkanit IV
Vuçiç shkarkoi kryetarin e komunës së Preshevës
Fakt shpjegues: Shqiprim Arifi, kryetari i komunës së Preshevës u shkarkua me vendim të qeverisë së Serbisë dhe jo presidentit Aleksandar Vuçiç. Qeveria e Serbisë është përgjegjëse për shpalljen e zgjedhjeve lokale dhe shpërberjen e asamblesë parlamentare lokale. Pasi u shpallën zgjedhjet e reja për Beogradin dhe komuna të tjera, Shqiprim Arifi ishte një nga zyrtarët që humbi postin pas shkrirjes së asamblesë parlamentare të komunës.
87 mercenarë shqiptarë janë vrarë në Ukrainë
Fakt shpjegues: Ministria për Evropën dhe Punët e Jashtme bën të ditur se nuk ka asnjë të dhënë zyrtare për të vrarë me nënshtetësi shqiptare, të përfshirë në konfliktin e armatosur Rusi-Ukrainë.
Shanset që Republika Srpska të bashkohet me Serbinë së shpejti janë zero
Fakt shpjegues: Edhe pse Bosnje Hercegovina është një shtet që nuk funksionon në këtë format në të cilin është vendosur nga marrëveshja e Dejtonit në 1995-n, që e ka ndarë vendin praktikisht në dy pjesë, e vetmja mënyrë që ajo të shkëputet është duke ndryshuar këtë marrëveshje me miratimin e fuqive Perëndimore, gjë që nuk ka gjasa të ndodhë të paktën në të ardhmen e afërt.
Kryetari i Komunës së Haraçinës u plagos në atentatin ndaj tij
Fakt shpjegues: Pretendimi është përgënjeshtruar nga Ministria e Punëve të Brendshme e RMV. Me anë të një njoftimi të postuar në Facebook, Ministria ka sqaruar më 1 prill se kryetari i Komunës nuk është lënduar.
Gabriel Escobar është shkarkuar nga detyra si i dërguari i posaçëm i ShBA për Ballkanin Perëndimor
Fakt shpjegues: Një numër portalesh raportuan në fillim të Majit se zv/ndihmës Sekretari amerikan i Shtetit Gabriel Escobar ishte shkarkuar nga detyra si i dërguari i posaçëm për Ballkanin Perëndimor për konflikt interesi që cënon neutralitetin e tij si ndërmjetës në dialogun Kosovë-Serbi. DASH përgënjeshtroi pretendimin e ngritur duke sqaruar se në fakt Escobar nuk është shkarkuar, por do të transferohej në javët në vijim për një pozicion tjetër brenda shërbimit diplomatik amerikan.
NATO nuk ka dërguar trupa për të luftuar në Ukrainë
Fakt shpjegues: Ndihmat që NATO i ka dhënë Ukrainës që prej nisjes së luftës nga Rusia, shpesh janë keqinterpretuar në media si pjesmarrje aktive në luftë përmes trupave ushtarake. Në fakt, një zyrtar i NATO-s njoftoi Faktojen se aleanca “Nuk ka plane për trupa luftarake të NATO-s në terren në Ukrainë.”
