Ngritja e një qendre rezidenciale për moshat e treta në Lezhë ishte një ndër premtimet kryesore të Pjerin Ndreut gjatë fushatës elektorale të majit 2023. Nga verifikimet rezulton se Bashkia e Lezhës ka planifikuar 23 milionë lekë për ngritjen e qendrës në vitin 2026.
Esmeralda Topi
Gjatë takimeve elektorale të majit 2023, kandidati socialist për Bashkinë e Lezhës Pjerin Ndreu, premtoi ndërtimin e një qendre të re për moshën e tretë.
“Ndër të tjera shpalosëm projektet konkrete që i përfshijnë në vetë të parë, siç është projekti për qendrën e moshës së tretë…”, premtonte Ndreu pas një takimi me ish ushtarakë dhe veteran.
Pjerin Ndreu fitoi mandatin e dytë në krye të Bashkisë Lezhë me 18,299 vota.
Fakt
Nga verifikimet e Faktoje rezulton se premtimi i kryebashkiakut Ndreu është pjesë e projekteve prioritare të Bashkisë Lezhë në buxhetin afatmesëm 2025-2027.
Investimi parashikohet të arrijë vlerën e 23 milionë lekëve dhe do të mbulohet me fonde të Bashkisë. Financimi planifikohet pas dy vitesh. Të njëjtin afat e konfirmon zyrtarisht edhe Bashkia në një përgjigje për Faktoje.al.
“Për qendrën e moshës së tretë Bashkia ka buxhetuar një shumë të caktuar e cila do të investohet në 2026.”, shprehet Bashkia.
Të vetmen pikëpyetje lidhur me qendrën e re rezidenciale për të moshuarit, Bashkia e Lezhës e ka me vendndodhjen.
“…jemi akoma në fazën e eksplorimit të aseteve që bashkia disponon për vendndodhjen e saj.”, përfundon përgjigjen zyrtare Bashkia Lezhë.
Qendra aktuale me kyç
Qendra e parë për Moshën së Tretë në qytetin e Lezhës u hap 16 vite më parë falë një bashkëpunimi mes Bashkisë dhe Kryqit të Kuq Shqiptar.
Bashkia rindërtoi një garazh të amortizuar në lagjen Besëlidhja duke e shndërruar në një qendër ditore të frekuentuar nga të moshuarit lezhjanë. Sipas Bashkisë, qendra vizitohej çdo ditë nga 80 të moshuar, kryesisht burra.
Qendra ishte e hapur çdo ditë nga ora tetë e mëngjesit deri në orën dy pasdite.
Në të, ofrohej kafe dhe çaj falas, përditësim i shtypit të ditës, lojra si domino, tavëll apo shah, si vizita mjekësore falas herë pas here.
Dhjetë vite më vonë, pranë shkollës “Gjergj Kastrioti” Bashkia e Lezhës përuroi mjediset e reja të qendrës ditore për të moshuarit.
Sipas orareve të vëna në dyert e qendrës, kjo hapësirë duhet të ishte e hapur nga ora tetë e mengjesit deri në mesditë. Pasditeve orari i parashikuar është tre me shtatë.
Por paraditen e 15 tetorit, qendra ishte e mbyllur.
Dy të moshuar u kthyen nga rruga pasi gjetën derën me kyç, ndonëse ora ishte 11.00 e paradites.
“Zakonisht është e hapur, por sot jo.”, pohoi shkurt njëri prej tyre.
Përfundim
Bazuar në informacionet e mbledhura dhe verifikimet në terren, premtimin e kryetarit të Bashkisë së Lezhës, Pjerin Ndreu, për qendrën e moshës së tretë, e kategorizojmë pjesërisht të mbajtur.
Faktoje, e mbështetur nga National Endoëment Democracy (NED) po monitoron 10 bashki në vend dhe po verifikon nëse janë mbajtur ose jo premtimet e dhëna nga kryebashkiakët.
