Pretendimi: Presidenti Biden i kthen shpinën publikun gjatë ceremonisë së 80-vjetorit të zbarkimit të
aleatëve
Verdikti: Mungon konteksti
Presidenti i ShBA-së, Joe Biden u kthye papritur gjatë ceremonisë përkujtimore të D-Day në Francë për të nderuar flamurin amerikan. Postime në rrjetet sociale po i japin zë teorive se Biden nuk është më i aftë për të drejtuar vendin.
Një video është bërë virale në rrjetet sociale, ku shihet teksa presidenti amerikan, Joe Biden kthehet papritur gjatë ceremonisë përkujtimore të D-Day në Francë. Qëllimi i këtyre pamjeve është që t’i japin më tepër zë teorive se Biden nuk është i aftë për të drejtuar ShBA-në.
“Pamjet shumë të diskutueshme të Bidenit gjatë festimeve të 80-vjetorit të zbarkimit të Normandisë…Nxirrni vetë përfundimet tuaja”-shkruajnë përdorues në rrjetet sociale.
Postimet e shpërndara në rrjetet sociale
Por, cila ishte arsyeja që Biden u kthye papritur gjatë ceremonisë? Raportimet në mediat e huaja argumentojnë se Shefi i Shtëpisë së Bardhë është kthyer për të nderuar himnin në nder të të rënëve në luftë.
E titulluar “taps”, pjesa e luajtur me trombë, është një lloj melodie e ngulitur thellë në traditën ushtarake, e cila luhet në përkujtim të ushtarëve që dhanë jetën për kombin, nga Forcat e Armatosura të Shteteve të Bashkuara. Tradita e nderimit të këtij himni, e shoqëruar edhe më ngritjen e flamurit, rekomandon për ushtarakët nderimin me dorën pranë kapeles, ndërsa për civilët vendosjen e dorës së djathtë mbi zemër.
Ky nderim nuk ka qënë pjesë e protokollit zyrtar dhe kjo ka bërë që pas presidentit Biden që u kthyer në drejtim të një flamuri amerikan dhe veteranëve që qëndronin në pjesën e pasme të skenës, të kthehen pas disa momentesh hezitimi edhe holomogu i tij francez, Emmanuel Macron dhe zonjat e para, Jill Biden dhe Brigitte Macron.
Video e plotë e ceremonisë, në pjesën 4:48 minuta, tregon një flamur amerikan të vendosur pas podiumit presidencial si dhe të gjithë skenografinë që është e veshur në pjesën e pasme me flamurët amerikanë, që duket se ka qenë arsyeja kryesore që ka çuar Biden që të kthehet mbrapa.
Skena e veshur me flamurë amerikanë
Presidenti Joe Biden mori pjesë në nderimet me rastin e 80-vjetorit të Ditës të Zbarkimit të Aleatëve për të çliruar Francën nga nazistët në Luftën e Dytë Botërore.
Faktoje ka verifikuar edhe më herët informacione të rreme që kanë qarkulluar në lidhje me të njëjtën ceremoni.
