Pretendimi: Kjo video tregon pamje nga tërmeti 8.8 ballë që goditi Rusinë lindore në korrik 2025
Verdikti: E pavërtetë
———————————————————–
Një video e postuar në rrjete sociale shqipfolëse pretendon se tregon “një nga tërmetet më të forta në botë” që “goditi Lindjen e Largët të Rusisë në orët e para të mëngjesit” të 31 korrikut 2025.
Më 30 korrik 2025, një tërmet i fortë me magnitudë 8.8 ballë Rihter goditi brigjet e gadishullit Kamchatka në Rusi. Goditja shkaktoi valë cunami që arritën në Japoni, Hawai dhe bregun perëndimor të Shteteve të Bashkuara.
Megjithatë, me anë të motorit të kërkimit pamor Google Lens, Faktoje gjeti se klipi i mësipërm qarkullon në rrjet që nga marsi i 2025.
Pamjet në fakt tregojnë një skenë që ndodhi në Myanmar gjatë tërmetit të fortë me magnitudë 7.7 të 28 marsit 2025, i cili shkaktoi mbi 3.000 vdekje.
