Njësia numër 10 në Tiranë, me 3,584 zgjedhës, po aplikon për herë të parë votimin elektronik. Që në çeljen e procesit të votimit janë krijuar radhë, veçaërisht në QV numër 1992, të vendosur në shkollën 9-vjeçare “Avni Rustemi”. Edhe pse ka grupe që demonstrojnë se si votohet elektronikisht, të moshuarit paraqesin vështirësi në momentin e votimit, çka vonon procesin.
Procesi i votimit në shkollën Avni Rustemi në kryeqytet po vijon me hapa të ngadaltë. Shkak është bërë “para-testimi” i votimit elektronik për personat e moshuar të cilët njihen për herë të parë me këtë proces.
*Pamje nga qendra e votimit në shkollën 9-vjeçare “Avni Rustemi”, Njësia 10
Radhë të gjata janë vënë re në qendrat e votimit brenda shkollës, veçanërisht në qendrën 1992. Gjatë orëve të para të këtij procesi ka pasur prani të madhe të personave të moshuar, të cilët kanë hasur paqartësi për mënyrën e re të votimit.
Në ndihmë të qytetarëve, në hollin e godinës ishte vendosur një pajisje për të demonstruar sesi votohet elektronikisht, megjithatë në momentin e votimit sërish të moshuarit janë shfaqur të pasigurtë.
*Pajisja në të cilën bëhet prova përpara votimit
*Një e moshuar e cila po provon votimin elektronik
N.L 70 vjeç, votuese në njësinë numër 10 në Tiranë, e pyetur nga Faktoje nëse kishte hasur probleme gjatë votimit me sistemin elektronik tha:
“Ishte shumë e vështire! Ishte në pike të hallit, por hajt më!”
Ky proces ka shkaktuar radhë në votime, duke bërë që të mos respektohet as distanca si pjesë e protokollit anticovid.
*Qytetarët në shkollën “Avni Rustemi” në radhë duke pritur të nisin votimin
