Pretendimi: Një trajtim për të shëruar osteoperozën dhe artritin këshillohet nga kreu i spitalit të Pekinit
Verdikti: E pavërtetë
Osteoperoza dhe artriti nuk kurohen me preparate që qarkullojnë në portale online. Faktoje verifikoi një tjetër artikull, ku përdoren mjekë të rremë për të bërë të besueshme këshilla mjekësore që rekomandojnë blerjen e produkteve të panjohur.
—————-
Artikuj të publikuar në mediat online ofrojnë një preparat, që pretendohet se trajton problemet e kyçeve.
“Unë do të listoj 22 metoda normale për të trajtuar problemet e kyçeve edhe nëse jeni 50 vjeç! – profesor Liao Chan flet për sëmundjet dhe problemet e moshës madhore”, shkruan portali që mban emrin Shoqata Mjekësore e Shqipëria.
Artikulli i publikuar në portale
Artikulli është ndërtuar në formën e një interviste me një mjek të quajtur Liao Chan, i cili prezantohet si kreu i departamentit farmaceutik të Spitalit Universitar të Pekinit.
Fillimisht ne vendosëm të bëjmë një verifikim mbi mjekun që përmendet në tekst. Nga një kërkim në internet, nuk gjetëm një mjek kaq të njohur në Kinë me këtë emër.
Gjithashtu ne verifikuam edhe imazhin e përdorur për të ilustruar mjekun në fjalë. Nga një kërkim i bërë nëpërmjet mjeteve të verifikimit të imazheve rezulton se personi në foto nuk është mjek, por biznesmen në Indonezi.
Më tej në shkrim thuhet se ai ka shëruar një pacient 18-vjeçar me osteoporozë në dy muaj dhe ka shëruar plotësisht një grua me artrit të rëndë për 78 ditë.
Por, a ka një kurë për osteoporozën dhe artritin?
Artriti nënkupton skuqje dhe ënjtje (inflamacion) të kyçeve. Pavarësisht studimeve dhe kërkimeve të shumta shkencore, nuk ka një kurë për artritin, por mund të trajtohet.
Qëllimi i trajtimeve është shpesh të kufizojë dhimbjen dhe inflamacionin dhe të ndihmojë në sigurimin e funksionit të kyçeve. Pavarësisht pretendimeve në artikullin e portalit, shkencëtarët nuk kanë arritur që të gjejnë një kurë as për osteoporozën.
Pra, nuk ka shërim për osteoporozën, por simptomat e sëmundjes suaj mund të menaxhohen me ilaçe dhe ndryshime të stilit të jetesës. Në varësi të moshës, gjinisë dhe historisë mjekësore, është mjeku ai që rekomandon trajtime të ndryshme për t’u ndihmuar.
Faktoje ka verifikuar një sërë skemash mashtrimi që bëhet nga faqe të ndryshme online, duke përdorur intervista me mjekë të rremë.
