Manipulim me posterin që liston vdekjen si pasojë anësore e vaksinimit

Një poster i manipuluar në mënyrë digjitale nën logon e HSE, organizatës shëndetësore publike në Irlandë, po shpërndahet masivisht në rrjete sociale, duke renditur “vdekjen e papritur” si një nga efektet anësore të vaksinave kundër COVID-19.

Në Irlandë njerëz të ndryshëm kanë rënë pre e manipulmit në rrjete sociale duke shpërndarë një poster të modifikuar në mënyrë digjitale, nën emrin e HSE, organizatës më të madhë të shërbimit shëndetësor publik të vendit. Imazhi tregon një poster me sfond të verdhë, të titulluar “Coronavirus COVID-19”.

Në tekstin shoqërues shkruhet: “Të gjithë atyre që kanë ardhur për të marrë vaksinat kundër COVID-19, ju falënderojmë që luajtët rolin tuaj në mbajtjen e sigurtë të komunitetit tonë“. Më tej, posteri liston disa nga efektet anësore të konstatuara nga vaksinimi: dhimbje koke, paralizë të mesit, sulme në zemër dhe, ajo që është edhe “thembra e Akilit”, vdekje të papritur. Ndërsa në fund të posterit, njerëzit që kanë përjetuar efekte anësore nga vaksinimi nxiten të kontaktojnë Autoritetin Rregullator të Produkteve Shëndetësore Irlandeze (HPRA). Imazhi i manipuluar është shpërndarë edhe në Shqipëri në rrjetin social Facebook nga përdorues të Facebook, duke e shoqëruar edhe më tekstit përkatës:

“Ministria e Shëndetsisë e Irlandës ka shpërndarë poster lidhur me vak sina C$OV@/ID 19 dhe efektet anësore të saj! Efektet anësore:Kokëdhimbje ,Çrregullime Menstruale, Paraliza Belit, Trashje e Gjakut, Sulm në zemër dhe në tru, Vdekje të papritur. – shkruhet në postimin përkatës.

Kolegët tanë të Reuters kanë verifikuar se imazhi është i manipuluar, në vazhdën e përpjekjeve dizinformuese nga grupimet e ndryshme kundër vaksinave anti Covid-19. Posteri imiton tipografinë, stilin dhe grafikën e përdorur në posterat zyrtarë të printuar nga HSE. Megjithatë, logoja HSE nuk është e dukshme në këndin e poshtëm djathtas të posterit, siç mund të shihet në posterat autentikë të krijuar nga bordi shëndetësor (këtu). Po ashtu, posteri i fabrikuar ka një harpë – simbolin kombëtar të Irlandës – së bashku me tekstin në irlandez dhe anglisht që lexon: “Njerëzit e Irlandës”. Në posterat zyrtarë të shtypur nga HSE, me të vërtetë mund të shihet harpa, por teksti në irlandez dhe anglisht thotë: “Qeveria e Irlandës”. Në arkivën e posterave publikë të HSE nuk shihet asnje poster i tillë rreth Covid-19. Edhe një zëdhënës i HSE i tha Reuters se asnjë poster i tillë nuk ishte publikuar nga autoriteti. “Ky nuk është një poster HSE dhe informacioni i përfshirë në poster nuk është autorizuar apo publikuar nga HSE”, tha zëdhënësi për Reuters. HSE nuk liston sulmet në zemër ose vdekjen e papritur si një efekt anësor të vaksinave (këtu).

*Lajmi publikohet në kuadër të bashkëpunimit mes Faktoje dhe Facebook për të luftuar dizinformimin