Rusia nuk po dërgon armë bërthamore në kufirin e saj me Finlandën, siç pretendohet në disa postime të shpërndara në rrjetet sociale. Faktoje sjell një sërë faktesh, referuar burimeve të besueshme se kemi të bëjmë me një informacion të rremë.
Më 4 prill 2023, Finlanda u bë anëtarja e 31-të e NATO-s, ndërsa në internet filluan të qarkullonin lajme të rreme për pasojat e këtij anëtarësimi. Një prej këtyre informacioneve është dhe ai për vendosjen e armëve bërthamore ruse në kufirin me Finlandën. Një lajm i tillë u shpërnda në Facebook në 9 prill edhe nga një profil shqiptar. “Rusia vendos armët bërthamore përgjatë kufirit me Finlandën”, shkruan “Investiguesi Shkrimor”.
Postimi është shoqëruar me një video, e cila pretendohet se tregon pajisje bërthamore që mbërrijnë në qytetin rus të Vyborg, pranë kufirit finlandez.
Screenshot, postimi i shpërndarë në rrjetet sociale
Lajmi është ndarë kryesisht nga media pro-ruse dhe është verifikuar gjithashtu nga kolegët e France24. Në verifikimin e kryer konstatohet se në fakt pamjet i përkasin një qyteti në verilindje të Moskës, të quajtur Kolchugino, larg kufirit ruso-finlandez. Nëpërmjet “Google Street View” shihet saktësisht se janë të njëjtat ndërtesa dhe kryqëzime që shfaqen edhe në videon e shpërndarë në rrjetet sociale.
Për sa i përket sistemit të raketave në klip, ato janë identifikuar si sisteme raketore RS-24 Yars të trajtuara nga Forcat Raketore Strategjike të Rusisë.
Këto lloj raketash dhe pajisje të tjera shfaqen çdo vit në Rusi. Çdo 9 maj, autoritetet ruse organizojnë Paradën e Ditës së Fitores për të përkujtuar fitoren e saj në fund të Luftës së Dytë Botërore.
Kolchugino është një qytet përmes të cilit kalojnë këto sisteme të lëshimit të raketave, për t’iu drejtuar Moskës.
Mediat e huaja, të cilat gjithashtu verifikuan pamjet e shpërndara, gjetën një video që i përket 13 majit të vitit 2015 me titull “Kthimi i pajisjeve nga parada e Fitores në Moskë përmes Kolchugino”. Edhe në këtë video shihet që është përdorur i njëjti sistem raketash dhe pajisjesh ushtarake.
Sipas faqes së internetit të forcave ruse, ekziston një bazë rreth 2 orë larg Kolchugino, që mban sistemin raketor Yars.
Pra, video e shpërndara në rrjetet sociale nuk tregon asnjë zhvillim të tillë afër kufirit ruso-finlandez dhe pretendimet e bëra për vendosje të armëve bërthamore si përgjigje ndaj anëtarësimit të Finlandës në NATO janë të rreme.
