Pretendimi: Xhenxhefili shkatërron qelizat burimore të kancerit të gjirit dhe është 10,000 herë më i fuqishëm se kimioterapia.
Verdikti: Mungon konteksti
—————————————————
Në rrjete sociale po qarkullon pretendimi se bima e xhenxhefilit ka aftësinë të shkatërrojë kancerin dhe është 10 mijë herë “më i fuqishëm“ se kemioterapia.
Duket se ky pretendim bazohet në një studim të botuar në 2015 në revistën shkencore PLoS One.
Vetë studimi diskuton efektivitetin e përbërjes “6-shogaol” që gjendet tek xhenxhefili kundër qelizave burimore të kancerit që janë “kimio-rezistente”.
Studiuesit arritën në përfundimin se “produkti i xhenxhefilit 6-shogaol ishte efektiv në qelizat e kancerit të gjirit në kulturën me një shtresë dhe kulturën sferoide në përqendrime të krahasueshme dhe në kushte ku taksol, edhe pse shumë efektiv në qelizat me një shtresë, ishte plotësisht joefektiv.”
Ky studim u keqinterpretua që në atë kohë. Titulli i artikullit Health Nut News ishte “STUDIMI I RI TREGON Xhenxhefili ËSHTË 10,000X MË I FORTË SE KIMIO (DHE VRET VETËM QELIZAT KANCERORE).” Autori gjithashtu arriti në përfundimin se “duhet bërë më shumë kërkime në mënyrë që të mund të tregojmë se mjekësia moderne e kancerit nuk është aq efektive sa mjekësia natyrale; të sëmuresh trupin tonë ndërsa përpiqemi të kurojmë një sëmundje thjesht nuk mjafton më” Në të vërtetë, shkenca e cituar ishte e lidhur vetëm në mënyrë margjinale me pretendimet e pabaza të artikullit.
Pra, studimi eksploronte potencialin e xhenxhefilit për të plotësuar ndoshta trajtimin e kancerit. Por a pohon ai se xhenxhefili është 10 mijë herë më mirë se kimioterapia, duke eliminuar nevojën për këtë të fundit?
Referenca ’10 mijë herë’ mund të gjurmohet në një fjali në raportin e studimit, e cila thotë: “Taxol, edhe pse ishte shumë aktiv në qelizat me një shtresë, nuk tregoi aktivitet kundër sferoideve edhe në një përqendrim 10 mijë herë më të lartë në krahasim me 6-shogaol”.
Por kjo nuk do të thotë se 6-shogaol është 10,000 herë më i mirë se kimioterapia, siç pretendohet. Studiuesit thonë se Taxol “nuk tregoi aktivitet kundër” qelizave specifike edhe kur përdorën një përqendrim 10 mijë herë më të lartë.
Më tej, studimi i vitit 2015 ishte mbi qelizat në një pjatë, jo në një trup njeriu.
Dr Sameer Kaul, Konsulent i Lartë i Onkologjisë dhe Robotikës në Institutin e Kancerit Apollo, tha për The Quint se: “Të thuash se xhenxhefili është më efektiv se kimioterapia është të jesh i papërgjegjshëm, mashtrues dhe i gabuar.”
Ai shtoi se hulumtimet klinike kanë vërtetuar se shafrani i Indisë në formë të koncentruar dhe të absorbueshme ka aktivitet anti-inflamator, antiseptik dhe citostatik, gjë që e lejon atë të përdoret së bashku me trajtimet konvencionale alopatike në role ndihmëse dhe mbështetëse.
“Por xhenxhefili nuk i është nënshtruar aq shumë kërkimeve klinike sa shafrani i Indisë në këto drejtime,” tha ai.
Edhe për shafranin e Indisë, fakti që duhet theksuar është se ai nuk mund të zëvendësojë trajtimet konvencionale si kimioterapia, por mund të përdoret vetëm si ndihmë shtesë.
Problemi më i rëndësishëm me postimet që pretendojnë se xhenxhefili vret kancerin më mirë se kimioterapia është se nuk ka terapi të miratuara me xhenxhefil që përdoren tani në vend të kemios. Ekziston vetëm një shpresë se një ditë, në një farë mënyre, mund të zhvillohet një terapi për të shpëtuar jetë me një ekstrakt xhenxhefili.
