Pretendimi: Zbulohet kartela mjekësore që tregon se boksierja algjeriane Imane Khelif është mashkull
Verdikti: E paprovuar
Më 4 nëntor, portale në vendin tonë kanë shpërndarë masivisht një informacion në lidhje me një raport mjekësor, ku pretendohet se boksierja algjeriane, Imane Khelif është mashkull.
“Publikimi i një raporti mjekësor ka shkaktuar tronditje në botën e sportit, ku rezulton se Imane Khelif, boksierja algjeriane që fitoi medaljen e artë në Lojërat Olimpike në Paris 2024, është mashkull.
Sipas gazetarit francez Djaffar Ait Aoudia, Khelif vuan nga një çrregullim i quajtur insuficienca e 5-alfa reduktazës. Raporti përmend praninë e testikujve të brendshëm dhe kromozomeve XY në trupin e saj”-shkruan JOQ.
Postimi i shpërndarë nga JOQ
Për këtë informacion të shpërndarë, portali përmend një gazetar francez, të quajtur Djaffar Ait Aoudia. Ky i fundit publikoi një artikull në portalin e tij “Reddux.info”, ku shkruante se kishte parë të dhënat mjekësore të boksieres algjeriane.
Ne bëmë një kërkim edhe në mediat ndërkombëtare, por konstatuam se në asnjë prej tyre nuk kishte raportime mbi këtë raport ku pretendohej se boksierja algjeriane është mashkull.
Nisur nga këto pretendime, kolegët e “Facta news” kanë bërë një verifikim, duke hedhur poshtë raportin e gazetarit francez. Sipas kolegëve të medias italiane, Djaffar Ait Aoudia nuk ka eksperienca të mëparshme në gazetari dhe veç kësaj ata kanë kofirmuar se jo të gjithë gazetarët (ose gazetarët e supozuar) të përmendur në rubrikën “Opinion” punojnë për gazetën.
“Cécile Debarge konfirmoi për Facta se nuk kishte qenë kurrë pjesë e redaksisë dhe se nuk kishte bashkëpunuar kurrë me Le Correspondant”, shkruajnë kolegët e Facta.
Në artikullin e tij, Ait Aoudia shkruan se ai e mori dosjen e Imane Khelif nga spitali “Kremlin Bicètre” në Paris dhe nga spitali “Mohamed Lamine Debaghine” në Algjeri. Sipas shkrimit të publikuar prej tij, dy endokrinologët e spitaleve, Soumaya Fedala dhe Jacques kishin hartuar një raport në vitin 2023 ku thuhej se Khelif paraqiste “anomali gjenetike” që tregonin se ajo ishte mashkull.
Mirëpo, raporti i publikuar me foto prej tij është shumë i dyshimtë. Së pari, emri i Khelif nuk figuron në dokumentin e publikuar. Edhe nëse është një dosje e vërtetë mjekësore, nuk është e sigurt që i përket boksieres algjeriane. Veç kësaj, nuk duken as firmat e dy mjekëve endokrinologë të përmendur. Dokumenti është prerë pikërisht në pjesën ku duhej të ishte firma e mjekut.
Dokumenti i publikuar
Jacques Young, endokrinologu për të cilin thuhet se ishte bashkëautor i vlerësimit, tha për DW se emri i tij po përdorej për të përhapur informacione të rreme.
Në lidhje me këto pretendime, kolegët e Facta kontaktuan spitalin “Kremlin Bicètre”, i cili dyshohet se i dorëzoi raportin mjekësor Djaffar Ait Aoudia. Megjithatë, spitali shpjegoi se: “Nuk jep asnjë informacion në lidhje me konfidencialitetin mjekësor dhe në veçanti, nuk specifikon nëse një person është ekzaminuar apo jo”. Prandaj, nuk ka gjasa që spitali t’i ketë lëshuar një certifikatë të pacientit gazetarit francez.
Boksierja algjeriane Imane Khelif, fituesja e medaljes së artë në Paris, ngjalli një debat të madh online për shkak të polemikave rreth gjinisë së saj. Komiteti Olimpik Ndërkombëtar (IOC) ka deklaruar për gazeta të ndryshme se boksierja ka ndërmarrë veprime ligjore pas lajmit që e cilëson atë si burrë, të përhapur nga dokumente të paverifikuara, origjina e të cilave nuk mund të konfirmohet.
Shënim: Data 18 dhjetor 2024 website Vox News e ka korrigjuar lajmin, pas verfikimit të të Faktoje. Lajmit të raportuar i është ndryshuar vlerësimi fillestar në Facebook.
