Pretendimi: Raketat iraniane mund të godasin Shqipërinë
Vlerësimi: Mungon konteksti
Lajmet e pavërteta apo të nxjerra jashtë konteksti lidhur me konfliktin e armatosur Izrael – Iran janë përhapur këto ditë me shpejtësi për shkak të interesit të lartë të publikut. Shpesh herë mediat bien pre e propagandave shtetërore që përhapin informacione duke shtrembëruar realitetin.
Një rast i tillë ishte pasqyrimi në media i një paralajmërimi të shpërndarë nga Ushtria Izraelite (IDF), ku pretendohej të pasqyrohej rrezja e veprimit të raketave iraniane.
Disa media e përhapën këtë publikim duke e interpretuar si rrezik global, ku përfshihet edhe Europa dhe Shqipëria, pa u thelluar më tej për t’i shpjeguar publikut vërtetësinë e këtij lajmi.
Konflikti Izrael-Iran rrezik global. Raketat mund të godasin Evropën Juglindore, në rrezik edhe Shqipëria – njoftojnë disa artikuj të publikuar në rrjet.
Ajo që mediat nuk njoftojnë në titull është pikërisht fakti se ky është një pretendim i përhapur nga ushtria izraelite, për atë çka sipas saj janë të afta të bëjnë raketat iraniane, dhe jo një kërcënim real që synon këto vende.
Harta është shpërndarë në rrjetet sociale të Forcave të Mbrojtjes Izraelite me pretendimin se “Irani është një kërcënim global” dhe se për këtë arsye Izraeli “ nuk kishte zgjdhje tjetër” përveçse të vepronte kundër tij.
Sigurisht që kjo është narrative izraelite e përdorur për të justifikuar sulmin e 12 qershorit drejtuar Iranit, pavarësisht faktit se ky i fundit ishte në bisedime me Shtetet e Bashkiara të Amerikës pikërisht për të ndaluar programin e tij bërthamor.
Ky pretendim i forace të Mbrojtjes izraelite, i nxjerrë jashtë konteksti krijon përshtypjen se në fakt Irani po kërcënon të gjithë botën me sulme të armatosura, gjë që nuk pretendohet nga askush.
Veçanërisht në periudha konfliktesh është tejet e rëndësishme që mediat t’i vendosin deklaratat e palëve në kontekst, dhe të informojnë qytetarin për faktin se ato janë pretendime që shpesh mbështeten tek propaganda që këtyre shteteve i vjen për mbarë.
