BallinaAktiviteteFaktoje çel fushatën kundër dizinformimit "Mos u rreni nga Rrenci! Faktet kanë rëndësi…"

Faktoje çel fushatën kundër dizinformimit “Mos u rreni nga Rrenci! Faktet kanë rëndësi…”

Me sloganin “Mos u rreni nga Rrenci! Faktet kanë rëndësi…” Faktoje çeli zyrtarisht fushatën e re kundër dizinformimit këtë të mërkurë, teksa i prezantoi të ftuarit edhe me personazhin simbol të kësaj fushate RRENCIN.

Në takimin e organizuar me këtë rast nga Faktoje, me mbështetjen e Ambasadës Suedeze në Tiranë ishin të pranishëm studentë të departamentit të gazetarisë si dhe nga Universiteti i Arteve. Në këtë takim ishte e pranishme Ambasadorja suedeze Elsa Hastad, Drejtuesi i Departamentit të Gazetarisë Mark Marku si dhe Profesori i Akademisë së Arteve Eno.

Ambasadorja suedeze Elsa Hastad, e vuri theksin tek rëndësia që ka verifikimi i fakteve teksa ndau këshilla konkrete për studentët që do të jenë gazetarë të ardhshëm.

“Ndërgjegjsohuni, bëhuni të guximshëm dhe ju lutem të bëheni kuriozë, sepse kurioziteti është aspekti më i rëndësishëm kur ju jeni gazetarë! Dhe ju lutem bëni kërkime përpara se të takoni dikë.” – iu tha ndër të tjera Ambasadorja Hastad studentëve të gazetarisë.

“Dizinformimi është si një sëmundje e butë, por e ligë që shpërndahet pa u ndier dhe në fund e gjen veten të helmuar. Gjatë viteve të fundit kur të gjithë u përballëm me pandeminë, tërmetin, luftën në Ukrainë, u pa se si dizinformimi shpërndahej lehtësisht në rrjetet sociale dhe verfikuesit e fakteve janë ata që pastrojnë dhe ndërtojnë me fakte, që në kohë të caktuar shpëtojnë edhe jetë.” – tha Klodiana Kapo, drejtuesja ekzekutive e organizatës Faktoje.

Profesor Eno Milkani, ndau me pjesëmarrësit videot e detajuara të fushatës kundër dizinformimit, duke u ndalur veçanërisht tek prezantimi i Rrencit, personazhit simbol të kësaj fushate.

“Rrenci është simbol i gazetarisë fake news. Të gjithë e njohim nga një Rrenc, sepse lajmet e rreme tani shpërndahen më lehtë, pasi komunikimi është bërë demokratik. Më parë kjo e drejtë ishte e kufizuar në disa persona, por sot çdo njëri që ka një telefon smart mund të prodhojë lajme të rreme për klikime që të sjellin para.” – theksoi Profesor Milkani.

Nga ana tjetër Profesor Mark Marku e vuri theksin tek pasojat e jashtëzakonshme që kanë lajmet e rreme për shoqërinë duke sjellë një shembull nga jeta e tij.

“Para dy ditësh mora një email, një ftesë nga Drejtoria e Përgjithshme e Policisë që më thoshte se duhet të paraqitesha në polici për një shkelje ligjore që kisha bërë. Ishte shkresë zyrtare e pastër. Por problemi ishte se në fund shkresa kishte emrin e drejtorit Gledis Nano, i cili nuk është më në këtë post. Unë e kisha këtë informacion, dikush tjetër që s’e di, mund të ishte paraqitur vërtetë atje, mund t’i ishte prishur dita, gjumi.. Pra lajmet e rreme interferojnë në mënyrë të drejtpërdrejtë në jetën tonë.” – tha ai.

Studentët e pranishëm thanë se fushata të tilla i vijnë në ndihmë të gjithëve, veçanërisht atyre që do të jenë pjesë integrale e mediave në të ardhmen e afërt.

“Jam shumë e lumtur që shkrimet e mia u publikuan dhe që u dhashë zë disa problematikave që shqetësojnë komunitetin ku unë jam rritur.” – tha Hafize Nelaj, pasi ndau eksperiencën e saj të parë si verifikuese e fakteve përmes projektit “Forcimi i kapaciteteve mbi verifikimin e Fakteve mbi çështjen integrimit në BE” i mbështetur nga Ambasada Suedeze në Shqipëri.

Esmeralda Topi
Esmeralda Topi
Gazetare Ajo është diplomuar në fakultetin e Gazetarisë, Universiteti i Tiranës në nivelin “Bachelor” si dhe ka kryer studimet në të njëjtin fakultet në nivelin “Master Shkencor” për “Marrëdhënie me Publikun”. Esmeralda ka më shumë se 10 vite që punon si gazetare ekonomie në media të ndryshme, kryesisht televizione. Fillimet e saj kanë qënë në Platformën Tring, si pjesë e kanalit informativ “7 News” ku ka mbuluar raportimet mbi çështjet me karakter social dhe ekonomik. Në mars të 2013, Esmeralda ka punuar si gazetare dhe njëkohësisht si folëse lajmesh në televizionin “Agon Channel”, ndërkohë që nga shtatori i 2015 ka qënë pjesë e redaksisë së lajmeve në RTSH si gazetare ekonomie, folëse lajmesh si dhe pjesë e stafit të emisionit “Përballë” nën autorësinë e Lutfi Dervishit.

Të fundit

Më të lexuarat

spot_img