Pretendimi: Autizmi shkaktohet nga parazitët dhe mund të shërohet.
Verdikti: E paprovuar
———————————————————-
Një postim i publicistit të teorive konspiracioniste Arianit Sllamniku pretendon se autizmi tek fëmijët shkaktohet nga “okupimi i trupit të fëmiut nga parazitët e ndryshëm,” dhe se “autizmi nuk është më diçka që nuk shërohet.”
Si zakonisht, nuk sillet ndonjë provë, burim apor referencë për të mbështetur këtë pretendim të jashtëzakonshëm.
Autizmi ka një sërë shkaqesh.
Hulumtimet sugjerojnë se çrregullimi i spektrit të autizmit (ÇSA) zhvillohet nga një kombinim i ndikimeve gjenetike dhe ndikimeve mjedisore, duke përfshirë përcaktuesit socialë.
Këta faktorë duket se rrisin rrezikun e autizmit dhe formësojnë llojin e autizmit që do të zhvillohet në një fëmijë. Megjithatë, rreziku i rritur nuk është i njëjtë me shkakun. Për shembull, disa ndryshime gjenetike të shoqëruara me autizmin mund të gjenden edhe tek njerëzit që nuk e kanë çrregullimin. Në mënyrë të ngjashme, jo të gjithë ata që janë të ekspozuar ndaj një faktori rreziku mjedisor për autizmin do ta zhvillojnë atë. Në fakt, shumica nuk do ta zhvillojnë.
Hulumtimet tregojnë se autizmi ka tendencë të ndodhë në familje, dhe një analizë e 7 studimeve me binjakë pohon se 60-90% e rrezikut të autizmit vjen nga gjenomi juaj. Nëse keni një fëmijë me autizëm, keni më shumë gjasa të keni një fëmijë tjetër autik. Anëtarët e tjerë të familjes suaj kanë gjithashtu më shumë gjasa të kenë një fëmijë me Çrregullim të Spektrit Autik.
Sipas Institutit Kombëtar amerikan të Shkencave të Shëndetit dhe Mjedisit, disa ndikime mjedisore që mund të rrisin rrezikun e autizmit janë mosha e avancuar e prindërve, ekspozimi para lindjes ndaj ndotjes së ajrit ose pesticideve të caktuara, obeziteti i nënës, diabeti ose çrregullimet e sistemit imunitar, prematuriteti ekstrem ose pesha shumë e ulët në lindje dhe komplikimet e lindjes që çojnë në periudha të privimit nga oksigjeni për trurin e foshnjës.
Dr. Sunil Mehta, një psikiatër nga Minesota, i cili përqendrohet në çrregullimet neurozhvillimore, me theks në Çrregullimin e Spektrit të Autizmit, tha për Lead Stories se autizmi është një çrregullim neurozhvillimor që ka të ngjarë të fillojë para lindjes. “Nuk ka prova shkencore që një infeksion akut nga një krimb, parazit ose ndonjë patogjen tjetër shkakton Autizëm. Gjithashtu nuk ka prova që marrja e ilaçeve antiparazitare, antifungale, antibiotike ose antivirale shëron ose zbut simptomat e Autizmit,” tha ai.
Deri më tani, nuk ka kurë për çrregullimin e spektrit të autizmit, por vetëm trajtime për të menaxhuar simptomat.
Prindërit e fëmijëve autikë shpesh hasin këshilla kontradiktore, trajtime “mrekullibërëse” të pavërtetuara dhe pretendime mashtruese në përpjekjet për të përmirësuar simptomat e një çrregullimi kryesisht gjenetik që aktualisht nuk ka kurë.
Disa organizata vetë-avokimi për autizmin e shohin autizmin si një neurologji të ndryshme dhe jo si një çrregullim mendor dhe mbështesin pranimin në vend të trajtimit.
Lëvizja për të drejtat e autikëve kundërshton “shërimin” e autizmit, duke e kritikuar idenë si të gabuar dhe të rrezikshme. Në vend të kësaj, autizmi shihet si një mënyrë jetese dhe mbështet pranimin në vend të kërkimit të një kure. Lëvizja për të drejtat e autikëve është pjesë e lëvizjes më të gjerë për të drejtat e personave me aftësi të kufizuara dhe pranon modelin shoqëror të aftësisë së kufizuar. Sipas modelit, problemet me të cilat përballen personat autikë shihen si diskriminim shoqëror dhe jo si mangësi personale.
Perspektiva anti-kurë është të parit e autizmit si një dukuri normale, një variacion alternativ në lidhjet e trurit ose një shprehje më pak e zakonshme e gjenomit njerëzor, në vend të një çrregullimi. Mbështetësit e kësaj perspektive besojnë se autizmi është një mënyrë unike e të qenit që duhet vlerësuar dhe përpjekjet për të eliminuar autizmin nuk duhet të krahasohen me shërimin e kancerit, por përkundrazi me “përpjekjet e një epoke të mëparshme për të kuruar mëngjarashët”.
