JOEL ÇELA
Edhe pse Shqipëria po përjeton një tjetër krizë pas tërmetit, për shkak të koronavirusit, ajo nuk do të ndalë apo zvogëlojë programin e rindërtimit, sipas kryeministrit. Në fund të muajit janar ministri i Rindërtimit, Ahmetaj njoftoi se më 10 mars do të niste puna e kompanive për ndërtimin e njësive individuale të banimit në zonat e dëmtuara nga tërmeti i 26 nëntorit. A u respektua ky afat?
Më 26 janar, gjatë prezantimit të platformës online, Ministri i Rindërtimit Arben Ahmetaj deklaroi se Bashkia e Tiranës dhe Fondi Shqiptar i Zhvillimit do të hapnin prokurimet për njësitë individuale në datat 7 deri në 10 shkurt. Këto dy institucione ishin përcaktuar si njësitë zbatuese, Bashkia e Tiranës për territorin e Tiranës, dhe Fondi Shqiptar i Zhvillimit për zonat e dëmtuara nga tërmeti jashtë kryeqytetit. Sipas ministrit Ahmetaj, në bazë të procedurës së përshpejtuar të prokurimit, puna në kantieret e ndërtimit do të fillonte më 10 mars.
“10 marsi do të ketë kompanitë e para të cilat do të fillojnë të ndërtojnë apo montojnë njësitë individuale në të gjithë territorin e zonave të dëmtuara në bazë të ligjit.”-u shpreh ministri
Të premten e 6 marsit. Ahmetaj u shpreh se qeveria ishte gati të niste në terren punën a për rindërtimin e 3400 shtëpive të para individuale, duke miratuar fondin prej 8.7 mld lekësh këtë qëllim.
“Që në fillim të javës së ardhshme shpallet data ndërkombëtare nga 2 njësitë zbatuese, FSHZH dhe Bashkia e Tiranës për rindërtimin e 3400 shtëpive individuale”, tha zoti Ahmetaj.
Më 10 mars ne iu drejtuam Ministrisë së Rindërtimit me një kërkesë për informacion, duke e pyetur mbi afatin e parë që vendosi zoti Ahmetaj për fillimin e ndërtimit të njësive individuale, e cila përfundonte pikërisht në atë datë.
Sot, më shumë se 15 ditë pune nga dërgimi i kësaj kërkese (afati ligjor është 10 ditë), nuk kemi marrë përgjigje nga ky institucion.
Më 25 mars, kryeministri Rama zhvilloi një komunikim virtual me ministrat e fokusuar në luftën kundër “armikut e të padukshëm”, koronavirusit të ri COVID-19. Në ndërhyrjen e tij, ministri Ahmetaj u shpreh se një problem ishte shfaqur në procesin e prokurimeve. Nga komunikimi i Ahmetajt, kuptohej se puna në terren jo vetëm që nuk kishte nisur, por ende nuk ishin shpallur kompanitë fituese për ta realizuar këtë.
Situata ishte e ndryshme në dy njësitë zbatuese, FSHZH dhe Bashkia e Tiranës. Ndërsa FSHZH do të mbyllte procedurën të premten e 27 marsit, për të kaluar më pas tek oferta financiare, Bashkia e Tiranës nuk ishte e bindur se kompanitë plotësonin kushtet e dokumentacionit. Sipas zoti Ahmetaj nga e premtja (27 mars), do të rihapej edhe një herë procedura e prokurimeve për të përcaktuar kompanitë që do të merreshin me ndërtimin.
Sot, më shumë se 3 javë nga afati fillestar në të cilin duhet të kishte filluar ndërtimi i njësive individuale nga kompanitë e para, ende nuk ka përfunduar procesi i prokurimit. Për këtë arsye, deklaratën e ministrit do ta kategorizojmë si të pavërtetë.
