Në shkurt të vitit 2018, u lançua shërbimi i parë i verifikimit të fakteve,  Faktoje në Shqipëri. Ky projekt u mbështet nga Usaid dhe u zbatua  nga organizata  Aleanca Gjinore për Zhvillim (GADC) në bashkëpunim  të ngushtë me Qendrën  Kombëtare për Studime Sociale (NCCS).

Prej shtatorit të vitit 2019, qendra Faktoje zhvillon veprimtarinë e saj si  një organizatë e pavarur mediatike, e financuar nga disa donatorë.

Klodiana Kapo
Drejtuese ekzekutive

Klodiana Kapo i është bashkuar skuadrës së “Faktoje” në pozicionin e Drejtoreshës Ekzekutive. Ajo vjen në këtë pozicion pas një eksperience trevjeçare si Menaxhere e Marrëdhënieve me Publikun dhe Komunikimin në Organizatën Ndërkombëtare për fëmijë World Vision, ku së fundmi u vlerësuar nga zyra Globale, me çmimin “Global Brand Award”. Znj, Kapo vjen në “Faktoje” pas një karriere 16 vjeçare në mediat më të njohura në vend ku ka raportuar kryesisht çështjet sociale e më konkretisht edukimin dhe sistemin arsimor, shëndetësinë, zhvillimin e rinisë, etj. Në karrierën e saj, Znj. Kapo ka punuar si gazetare në Top Channel (ku numëron dhjetëra dokumentarë dhe histori personale), ka pasur rubrikën e saj të përjavshme në gazetën “Shqip”, dhe ka punuar si kryeredaktore në Televizionin Publik Shqiptar.
Klodiana numëron ndërkohë edhe një sërë fushatash të suksesshme ndërgjegjësimi për organizata jo qeveritare lokale dhe ndërkombëtare, si dhe është bashkautore në dy libra.

Viola Keta

Kryeredaktore

Viola Keta është pjesë e “Faktoje” që prej muajit prill të vitit 2019. Ajo është diplomuar në Fakultetin e Gazetarisë, Universiteti i Tiranës. Viola e ka nisur karrierën si gazetare në “TV Koha” në vitin 1999, pasi punoi në disa projekte vullnetare për mbështetjen e të prekurve nga lufta në Kosovë. Ajo ka raportuar fillimisht çështje sociale në televizion dhe më pas ka mbuluar raportimin për prokurorinë dhe gjykatat. Viola ka qenë pjesë e disa trajnimeve brenda dhe jashtë Shqipërisë. Një prej tyre është ai në Boston, në radion dhe televizionin WBUR 65 dhe Gjykatën Federale Massachusetts. Gjatë periudhës 2000-2004 ajo ndoqi dhe raportoi disa procese të rëndësishme gjyqësore, vrasja e deputetit të Partisë Demokratike Azem Hajdari, grupi i “Kokainës” dhe investigoi mbi tragjedinë e gomones me 22 emigrantë në Vlorë. Gjatë zgjedhjeve të përgjithshme të vitit 2013 punoi në zyrën për monitorimin e medias në misionin e OSBE-ODHIR. Nga viti 2007 deri në prill të 2019-s Viola ka punuar si redaktore në televizionin informativ Top News, pjesë e “Top Media”.

Aimona Vogli

Menaxhere Editoriale

Aimona Vogli është Menaxher Editorial pranë Faktoje.al prej qershorit 2021. Aimona i bashkohet ekipit të Faktoje pas një eksperience 13-vjeçare në media, atë televizive, të shkruar e digjitale, por dhe pas një eksperience 3-vjeçare, si pjesë e shoqërisë civile në sektorin e Komunikimit & PR.
Aimona e ka nisur karrierën e saj në 2005 në Gazeta Shqiptare, si gazetare ku ka mbuluar ndër të tjera çështjet sociale. Prej vitit 2010 Aimona ka qenë pjesë e Televizionin Kombëtar Klan, ku ka punuar si gazetare për disa programe televizive dhe më pas redaktore përgjegjëse e programit të pasdites “Rudina” me autorësi të Rudina Magjistarit. Për dy edicione radhazi (2015-2016) Aimona ka mbuluar dhe pozicionin e gazetares dhe përgjegjëse për Marrëdhëniet me Shtypin, për Festovalin Ndërkombëtar Operistik “Marie Kraja”.

Inva Hasanaliaj

Gazetare

Inva Hasanaliaj, gazetare që prej vitit 2015. Ajo është pjesë e “Faktoje” si gazetare fact-checking që prej themelimit. Ka përfunduar studimet për Marrëdhënie Publike Komunikim ndërsa eksperiencat e mëparshme të saj si gazetare përfshijnë fushat e gazetarisë ekonomike, politike dhe investigative. Fillimisht ka punuar për gazetën “Mapo” ku ka trajtuar çështjet ekonomike. Po ashtu ka qenë pjesë e “Laboratorit të Gazetarisë Investigative”, mbështetur nga Ambasada Amerikane. Inva është certifikuar në disa fusha të komunikimit për tema si : “ Pjesëmarrje në ndërtimin e mediave alternative” “Pjesëmarrje në Akademinë Evropiane për Gazetarët e Qendrës së Përbashkët për marrëdhëniet Shqipëri-Serbi “ etj.

Joel Çela

Gazetar

Joel Çela është gazetar i “Faktoje” që nga muaji dhjetor i vitit 2019. Ai është diplomuar në degën e Gazetarisë dhe Komunikimit nga Universiteti i Tiranës në vitin 2016. Është angazhuar në media të ndryshme që nga vitit 2013. Ka punuar si redaktor në Mad TV (IN TV) nga viti 2014 deri në në fund të vitit 2015. Aty ka vijuar punën deri në shtator të vitit 2017. Më pas është angazhuar si kryeredaktor në median online “Arbëria News” gjatë vitit 2018. Joeli është diplomuar nga Laboratori i Gazetarisë Investigative, një program trajnimi i iniciuar nga Ambasada Amerikane në bashkëpunim me Qendrën Shqiptare për Gazetari Cilësore. Aty ka shërbyer edhe si përkthyes nga gjuha shqipe në atë angleze për artikujt e botuar nga Qendra. Nga janari i vitit 2019 deri në korrik të po këtij viti ka punuar si gazetar në emisionin “Ditë për Ditë” në Tv Klan. Prej vitit 2018 është Koordinator për Tiranën i “Unionit të Gazetarëve Shqiptarë”.

Aurora Shpataj

Gazetare

Aurora Shpataj i është bashkuar skuadrës së “Faktoje” që nga mars i vitit 2020. Aurora vazhdon studimet në Universitetin e Tiranës për Gazetari dhe Komunikim. Ka punuar për një periudhë 6-mujore si gazetare në TV “Klan Plus”. Po ashtu ka punuar në një projekt të Agjensisë Zvicerane për Zhvillim dhe Bashkëpunim (SDC) në rolin e gazetares. Prej vitit 2019 Aurora ka marrë pjesë në workshope, shkolla verore, konferenca si dhe trajnime ndërkombëtare për çështje të ndryshme të medias.

Ilda Hoxha

Gazetare

Ilda Hoxha (Koçi) është gazetare e Faktoje që prej shtatorit të vitit 2021. Ka përfunduar studimet në nivelin “Bachelor” për “Gazetari dhe Shkenca Komunikimi” në “Universitetin e Tiranës” dhe studimet në nivelin “Master Shkencor” në drejtimin “Marketing Mediatik”. Ka punuar si gazetare në “Top Albania Radio” në periudhën janar 2013-dhjetor 2014. Ka punuar si gazetare  në “Gazetën Shqip” në print për çështjet sociale në periudhën dhjetor 2014- korrik 2016. Në periudhën shkurt 2015-gusht 2017 ka punuar për “Votra Magazine”, ku ka mbuluar pjesën e marketingut të saj, por edhe shkrimin e artikujve me karakter kulturor dhe promovues për Shqipërinë. Ka punuar si redaktore në “Gazetën Shqip Online” në periudhën korrik 2016-deri më 19 maj 2021, Në periudhën qershor-gusht 2021 ka punuar si gazetare në emisionin “Pushime On Top” në Top Channel.