Komisioni i Ankimimeve dhe Sanksioneve (KAS) pranoi në thelb ankesën e Kuvendit ndaj vendimit të Komisionerit Shtetëror të Zgjedhjeve, që rekomandonte bllokimin e dy nismave ligjore: “Paketën e Maleve” dhe ndryshimet në ligjin për TVSH-në në bujqësi. Pas shqyrtimit një orësh të ankesës, KAS vendosi të shfuqizojë vendimin e KQZ.   

Kryekomisioneri, Ilirjan Celibashi, kishte vlerësuar më herët se dy draftet prekin politika të rëndësishme fiskale dhe mund të ndikojnë drejtpërdrejt në zgjedhjet e 11 majit, duke shkelur parimin e barazisë mes aktorëve ekonomikë. Sipas KQZ dy draftet krijojnë perceptimin e përdorimit të mjeteve ligjore për përfitime elektorale.

Por në kundërshtim me këtë argument, zyra juridike e Kuvendit bashkë me dy këshilltaret e komisioneve (ku po ndiqen projektligjet)  pretenduan në mbledhjen e KAS se nuk ka përfitime të drejtpërdrejta për qytetarët.  

Arsyet

Për “Paketën e Maleve”, Kuvendi parashtroi katër arsye pse kjo nismë nuk bie në kundërshtim me Kodin Zgjedhor: Nuk përfshin shpërndarje të fondeve publike, synon rregullimin e çështjeve të pronësisë në zonat malore, përfitimet janë afatgjata dhe jo të menjëhershme dhe se zbatimi i saj nuk favorizon një grup të caktuar.

Në argumentet e Kuvendit për pr/ligjin për TVSH në Bujqësi thuhet njësoj se nuk ka përfitime të drejtpërdrejta për kategori specifike të popullsisë. Nismëtari i këtij projektligji, deputeti i PS, Erion Brace argumentoi gjithashtu gjatë mbledhjes së KAS se projektligji nuk ndryshonte nivelin e taksave për një grup të caktuar zgjedhësish, por sillte një rregullim të përgjithshëm të TVSH-së për sektorin bujqësor.

Kuvendi kërkoi shfuqizimin e vendimit të Ilirjan Celibashit, konstatimin se asnjëri prej projektligjeve të sipërpërmendur nuk bie ndesh me  Kodin Zgjedhor, si dhe lejimin e vijimit të procedurave parlamentare për shqyrtimin dhe miratimin e projektligjeve në fjalë pa kufizime të pajustifikuara.

KAS

Gjatë mbledhjes në Komisionin e Ankimimeve dhe Sanksioneve (KAS), anëtarët pyetën Kuvendin nëse mosmiratimi i Paketës së Maleve në këtë sesion parlamentar do të kishte ndonjë pasojë konkrete. Përfaqësuesit e Kuvendit pranuan se çdo vonesë mund të ketë një ndikim, por nuk përcaktuan se sa: “Çdo vonesë ka një impakt, por nuk mund ta vlerësoj se sa do të jetë ky impakt”.

Deputeti i PS-së, Erion Braçe, deklaroi se për projektligjin për bujqësinë kishte pasur dakordësi edhe me opozitën në mbledhjen e konferencës së kryetarëve, ndryshe nga Paketa e Maleve, e cila ishte përfshirë vetëm si prezantim.

Përfaqësuesja e Kuvendit theksoi se nuk kishte nxitim për ta kaluar Paketën e Maleve me procedurë të përshpejtuar

Megjithatë, Kuvendi nuk dha një përgjigje të drejtpërdrejtë për shqetësimin e ngritur nga një anëtar i KAS nëse Kryeministri Edi Rama mund ta shfrytëzonte këtë nismë për qëllime elektorale gjatë takimeve të tij në zonat e prekura nga projektligji.